এখন নদী,দলং,সুৰংগ ইত্যাদি... | সাগৰ | অসমীয়া কবিতা

 এখন নদী,দলং,সুৰংগ ইত্যাদি.....

সাগৰ

হঠাৎ প্ৰকট হয় এখন নদী

হঠাৎ সাজি পেলোৱা হয় এখন দলং

আৰু দুফাল কৰি বুকুৰ মাজুলি

পাৰ হৈ যায় এদল মানুহ

এৰা মানুহেই

নদীখনৰ সিটোপাৰ হৈ পৰে

স্বপ্নৰ এখনি নগৰ

হঠাৎ

এইবাৰ তো কথাই সুকীয়া

নদীখনৰ তলেৰে এটা সুৰংগ সজা হ'ব

সুৰংগৰে সিটো পাৰ ওলাবগৈ

আৰু এদল মানুহেই

নগৰ হৈ পৰা মাজুলিখন হৈ পৰিব স্বৰ্গ

ফুলি উঠিব পাৰিজাত

ৰাতি ফুলি ৰাতিতেই সৰি পৰা

সেই পাৰিজাত

হঠাৎ

হঠাৎ

হঠাৎ নদীখন শুকাই যাব

এইবাৰো

খহি পৰাৰ দৰেই যোৱাবাৰ দলংখন

এইবাৰ ভাঙি থাকিব সুৰংগটো

মাথো দুফাল কৰি থৈ যাব

প্ৰতিবাৰৰ দৰেই বুকুৰ মাজুলিখন

লগ হ'ব নোৱাৰাকৈ বহুদিনলৈ আমাক•••